গুৱাহাটীৰ বিভিন্ন স্থানত তালাচী চলাই বিগত দুদিনত ১৭ জন বাংলাদেশীক আৰক্ষীয়ে গ্ৰেপ্তাৰ (Bangladeshi detained) কৰিছে। বুধবাৰে এই গ্ৰেপ্তাৰৰ কথা ঘোষণা কৰে উপ-আৰক্ষী আয়ুক্ত (অপাৰেচনচ) কুলেন্দ্ৰনাথ ডেকাই।
ডিচিপি ডেকাই জনোৱা মতে, মঙলবাৰে পল্টনবজাৰ ৰে’ল ষ্টেচনত মুম্বাই অভিমুখী লোকমান্য তিলক টাৰ্মিনাছ এক্সপ্ৰেছৰ সাধাৰণ দবাত তালাচী অভিযানৰ সময়ত চাৰিজন বাংলাদেশীক গ্ৰেপ্তাৰ কৰা হয়। পূৰ্বে আৰক্ষীয়ে তথ্য লাভ কৰিছিল আৰু সেয়েহে ৰে’লখনত তালাচী চলোৱা হৈছিল। তাতেই চাৰিওজনৰ সন্ধান পোৱা যায়। প্ৰাথমিক তদন্তৰ সময়ত আৰক্ষীয়ে জানিব পাৰে যে বাংলাদেশী নাগৰিককেইজন মেঘালয়ৰ ডাউকী হৈ ভাৰতত প্ৰৱেশ কৰিছিল। তাৰ পৰাই ৫ অক্টোবৰত গুৱাহাটীলৈ আহি হোটেল এখনত আছিল।
আটকাধীন লোককেইজনক সোধা-পোছাৰ অন্তত গুৱাহাটীৰ এখন হোটেলৰ মালিকে তেওঁলোকৰ আশ্ৰয়ৰ ব্যৱস্থা কৰা বুলি জানিব পৰা গৈছে। কিছুদিন তাত থকাৰ পিছত অনুপ্ৰৱেশকাৰী বাংলাদেশী নাগৰিককেইজনে অসম এৰি দেশৰ বিভিন্ন প্ৰান্তলৈ যায়। আৰক্ষীয়ে তালাচী চলাই হোটেলখন উদ্ধাৰ কৰে। হোটেলৰ মালিক অমিত্ৰাই দৈমাৰী আৰু তেওঁৰ তিনি সহযোগী হজৰত আলী, বিকাশ পাল আৰু ৰঞ্জন ধৰক গ্ৰেপ্তাৰ কৰা হয়। ডিচিপি ডেকাই কয় যে হজৰতে দৈমাৰীৰ হোটেলত থকাৰ ব্যৱস্থা কৰি দিছিল। এই গেঙৰ ‘মূল মাষ্টাৰমাইণ্ড’ আছিল তেওঁ। হজৰতক সহায় কৰিছিল বিকাশ আৰু ৰঞ্জনে। অনুপ্ৰৱেশকাৰী বাংলাদেশীক ধৰিবলৈ বুধবাৰে সমগ্ৰ গুৱাহাটীত এক তালাচী অভিযান চলোৱা হয়। সেই সময়ত আৰু ১৩ জন বাংলাদেশীক আন এখন হোটেলৰ পৰা গ্ৰেপ্তাৰ কৰা হয়।
ডিচিপি ডেকাই কয় যে ধৃত বাংলাদেশী নাগৰিককেইজনক ভাৰতৰ পৰা বিতাড়নৰ প্ৰক্ৰিয়া আৰম্ভ হৈছে। কেৱল সেয়াই নহয়, অনাগত দিনত অনুপ্ৰৱেশকাৰী বাংলাদেশীক ধৰিবলৈ অভিযান তীব্ৰতৰ কৰা হ’ব।
