ভাৰতৰ নিৰ্বাচন আয়োগৰ নিৰ্দেশনা অনুসৰি, শুদ্ধ, সহজলভ্য, অন্তৰ্ভুক্তিমূলক আৰু ত্ৰুটিমুক্ত ভোটাৰ তালিকা প্ৰস্তুত কৰা তথা সকলো ভোটাৰৰ বাবে এক সূচাৰু প্ৰক্ৰিয়াৰে ভোটদান সুনিশ্চিত কৰাৰ উদ্দেশ্যৰে ফটোযুক্ত ভোটাৰ তালিকাৰ বিশেষ সংক্ষিপ্ত সংশোধনী প্ৰক্ৰিয়া হাতত লোৱা হ’ব বুলি অসমৰ মুখ্য নিৰ্বাচনী বিষয়াৰ কাৰ্যালয়ে সাধাৰণ ৰাইজ তথা সকলো সংশ্লিষ্ট পক্ষক অৱগত কৰিছে।
এই কাৰ্যসূচীৰ অংশ হিচাপে, বৰ্তমানৰ ভোটগ্ৰহণ কেন্দ্ৰসমূহৰ অৱস্থান আৰু ভোটাৰ তালিকাৰ প্ৰাসংগিক খণ্ডসমূহৰ ১০০% কায়িক পৰীক্ষণ কৰাৰ পিছত ভোটগ্ৰহণ কেন্দ্ৰসমূহৰ যুক্তিযুক্তকৰণ, পুনৰ-ব্যৱস্থাপন আৰু পুনৰগঠন কৰা হ’ব।
১. ভোটগ্ৰহণ কেন্দ্ৰসমূহৰ যুক্তিযুক্তকৰণ আৰু নতুন কেন্দ্ৰ স্থাপন
নিৰ্বাচনী পঞ্জীয়ন বিষয়াসকলে নতুন ভোটগ্ৰহণ কেন্দ্ৰ নিৰ্মাণৰ প্ৰয়োজনীয়তা মূল্যায়ন কৰিব। ভাৰতৰ নিৰ্বাচন আয়োগৰ পূৰ্বানুমতি অবিহনে এটা ভোটগ্ৰহণ কেন্দ্ৰত ভোটাৰৰ সংখ্যা ১২০০ গৰাকীতকৈ অধিক হ’ব নোৱাৰিব। যিকোনো নতুন ভোটগ্ৰহণ কেন্দ্ৰৰ প্ৰস্তাৱ দিয়াৰ পূৰ্বে একে স্থানতে থকা কেন্দ্ৰসমূহৰ মাজত ভোটাৰৰ সংখ্যা সমান কৰাৰ বাবে সমীপৱৰ্তী ভোটগ্ৰহণ কেন্দ্ৰসমূহৰ খণ্ডবোৰ যুক্তিযুক্তভাৱে পুনৰ-ব্যৱস্থাপন কৰা হ’ব।
যিকোনো ধৰণৰ খেলিমেলি ৰোধ কৰাৰ বাবে প্ৰত্যেকটো ভোটগ্ৰহণ কেন্দ্ৰৰ অধিকাৰক্ষেত্ৰ স্পষ্টভাৱে নিৰ্ধাৰণ কৰা হ’ব। ভোটাৰে যাতে ভোটগ্ৰহণ কেন্দ্ৰত উপস্থিত হ’বলৈ ২ কিলোমিটাৰতকৈ অধিক দূৰত্ব ভ্ৰমণ কৰিবলগীয়া নহয় বা কোনো প্ৰাকৃতিক বাধা পাৰ হ’বলগীয়া নহয়, তাৰ বাবে পৰ্যাপ্ত ব্যৱস্থা গ্ৰহণ কৰা হ’ব। সুগমতা সুনিশ্চিত কৰিবলৈ ভোটগ্ৰহণ কেন্দ্ৰসমূহ অগ্ৰাধিকাৰ ভিত্তিত ভূ-মহলা বা পথৰ প্ৰৱেশদ্বাৰৰ সমতলত স্থাপন কৰা হ’ব।
উচ্চ অট্টালিকা, গ্ৰুপ হাউছিং ছচাইটি, ভূ-মহলাত সমূহীয়া সুবিধা বা প্ৰেক্ষাগৃহ থকা আৱাসিক কল্যাণ সমিতি আৰু চহৰ অঞ্চলৰ বস্তি অঞ্চলসমূহত বিশেষ গুৰুত্ব প্ৰদান কৰা হ’ব। নিৰ্বাচন আয়োগৰ ২২ ছেপ্টেম্বৰ ২০২৩ তাৰিখৰ নিৰ্দেশনা নং 23/2023-ERS (Vol-III) অনুসৰি এই অঞ্চলসমূহত উপযুক্ত স্থান চিনাক্ত কৰিবলৈ ব্যাপক জৰীপ চলোৱা হ’ব।
২. কায়িক পৰীক্ষণ আৰু অনুমোদন প্ৰক্ৰিয়া
অতিৰিক্ত ভোটগ্ৰহণ কেন্দ্ৰৰ প্ৰয়োজনীয়তা মূল্যায়ন কৰাৰ লগে লগে ই আৰ অ’ সকলে সংশ্লিষ্ট জিলা নিৰ্বাচনী বিষয়াসকলক এই বিষয়ে অৱগত কৰিব।
জ্যেষ্ঠ বিষয়াসকলৰ জৰিয়তে জিলা নিৰ্বাচনী বিষয়াই বৰ্তমানৰ আৰু নতুনকৈ প্ৰস্তাৱিত সকলো ভোটগ্ৰহণ কেন্দ্ৰৰ ১০০% কায়িক পৰীক্ষণ সুনিশ্চিত কৰিব। এই পৰীক্ষণে অট্টালিকাবোৰৰ অৱস্থা, উপযোগীতা আৰু সুচাৰুৰূপে নিৰ্বাচন অনুষ্ঠিত কৰাৰ বাবে আয়োগে নিৰ্ধাৰণ কৰি দিয়া মাপকাঠীসমূহ মানি চলিছে নে নাই সেয়া মূল্যায়ন কৰিব। মনোনীত বিষয়াসকলে এই কায়িক পৰীক্ষণক প্ৰমাণ-পত্ৰ প্ৰদান কৰিব।
নতুন ভোটগ্ৰহণ কেন্দ্ৰৰ প্ৰস্তাৱ চূড়ান্ত কৰাৰ পূৰ্বে জিলা নিৰ্বাচনী বিষয়াসকলে স্বীকৃত ৰাজনৈতিক দলসমূহৰ প্ৰতিনিধিসকলৰ সৈতে আলোচনা কৰিব। ইয়াৰ পিছত একত্ৰিত প্ৰস্তাৱসমূহ ভাৰতৰ নিৰ্বাচন আয়োগৰ অনুমোদনৰ বাবে অসমৰ মুখ্য নিৰ্বাচনী বিষয়ালৈ প্ৰেৰণ কৰা হ’ব।
ভোটগ্ৰহণ কেন্দ্ৰৰ স্থান সলনিৰ যিকোনো প্ৰস্তাৱ ১০০% কায়িক পৰীক্ষণ আৰু নিৰীক্ষণৰ পিছত নতুন স্থানৰ অক্ষাংশ আৰু দ্ৰাঘিমাংশৰ সৈতেহে আয়োগৰ ওচৰত দাখিল কৰা হ’ব।
অযোগ্য ভোটাৰৰ নাম কৰ্তন
প্ৰ-পত্ৰ ৭ আৰু অন্যান্য প্ৰযোজ্য নিয়মৰ জৰিয়তে দ্বৈত নাম, মৃত ভোটাৰ আৰু স্থায়ীভাৱে স্থানান্তৰিত হোৱা ভোটাৰসকলৰ নাম চিনাক্ত কৰি আঁতৰাবলৈ ই আৰ অ’সকলে নিৰ্ধাৰিত প্ৰক্ৰিয়া অনুসৰি প্ৰয়োজনীয় ব্যৱস্থা গ্ৰহণ কৰিব।
নিৰৱচ্ছিন্ন উন্নীতকৰণৰ সময়ছোৱাত প্ৰাপ্ত সকলো দাবী আৰু আপত্তি খচৰা ভোটাৰ তালিকা প্ৰকাশ পোৱাৰ পূৰ্বেই নিষ্পত্তি কৰা হ’ব।
৬. ফটোযুক্ত ভোটাৰ তালিকাৰ সময়সূচী বিশেষ সংক্ষিপ্ত সংশোধনীৰ সময়সূচী বিশেষ সংক্ষিপ্ত সংশোধনীৰ তলত দিয়া ধৰণৰ:
ক্ৰমিক নং কাৰ্যসূচী সময়সূচী
১. ভোটগ্ৰহণ কেন্দ্ৰসমূহৰ যুক্তিযুক্তকৰণ/পুনৰ-ব্যৱস্থাপন ০২.১১.২০২৬ৰ ভিতৰত
২. একত্ৰিত খচৰা ভোটাৰ তালিকা প্ৰকাশ ১২.১১.২০২৬
৩. দাবী আৰু আপত্তি দাখিলৰ সময় ১২.১১.২০২৬ ৰ পৰা ১১.১২.২০২৬ লৈ
৪. দাবী আৰু আপত্তিসমূহৰ নিষ্পত্তি ২৮.১২.২০২৬ ৰ ভিতৰত
৫. চূড়ান্ত ভোটাৰ তালিকা প্ৰকাশ ০৪.০১.২০২৭
মুখ্য নিৰ্বাচনী বিষয়াৰ কাৰ্যালয় আৰু জিলা নিৰ্বাচনী বিষয়াসকলে বিশেষ সংক্ষিপ্ত সংশোধনীৰ অগ্ৰগতিৰ তথ্য জনাবলৈ আৰু মতামত গ্ৰহণ কৰিবলৈ ৰাজনৈতিক দলসমূহৰ সৈতে নিয়মীয়াকৈ যোগাযোগ ৰাখিব। অসমৰ মুখ্য নিৰ্বাচনী বিষয়াই সকলো ভোটাৰ, স্বীকৃত ৰাজনৈতিক দল আৰু অন্যান্য সংশ্লিষ্ট পক্ষক এই প্ৰক্ৰিয়াৰ সময়ত সহযোগিতা আগবঢ়াবলৈ আহ্বান জনাইছে। এই কাৰ্যসূচীৰ মূল উদ্দেশ্য হৈছে ভোটাৰ তালিকাৰ শুদ্ধতা আৰু বিশ্বাসযোগ্যতা শক্তিশালী কৰা, ভোটগ্ৰহণ কেন্দ্ৰসমূহলৈ সহজ যাতায়াত সুনিশ্চিত কৰা আৰু প্ৰতিজন যোগ্য ভোটাৰক তেওঁলোকৰ গণতান্ত্ৰিক ভোটাধিকাৰ সাব্যস্ত কৰাত সহায় কৰা।
