প্ৰথমে পত্নীক হত্যা। তাৰ পাছত বেংগালুৰু টেক্সিচালক ইন্দুশেখৰে এজন এজনকৈ শহুৰেকৰ ছয়জন সদস্যক হত্যা (Man killed Family) কৰে। তেওঁ নিজৰ টেক্সি ব্যৱহাৰ কৰি সাতজন লোকৰ মৃতদেহ মহানগৰীৰ বিভিন্ন প্ৰান্তত পেলাই দিয়ে। আনহাতে, ইন্দুশেখৰৰ নাবালিকা কন্যাই তেওঁক মৃতদেহ নিষ্কাশনত সহায় কৰিছিল। এই অভিযোগে চাঞ্চল্যৰ সৃষ্টি কৰিছে।
তেওঁৰ লগতে ইন্দুশেখৰৰ কন্যাকো গ্ৰেপ্তাৰ কৰা হৈছে। হত্যাকাণ্ডৰ আঁৰৰ আচল কাৰণ, ইন্দুশেখৰে কেনেদৰে মৃতদেহ নিষ্কাশনৰ পৰিকল্পনা কৰিছিল সেইবোৰৰ উত্তৰ এতিয়া বেংগালুৰু আৰক্ষীয়ে বিচাৰি আছে। একে সময়তে ইন্দুশেখৰৰ শহুৰেকৰ ৬ জন সদস্যৰ মৃতদেহ উদ্ধাৰৰ বাবে তালাচী অভিযান অব্যাহত আছে। এই পৰ্যন্ত আৰক্ষীয়ে উদ্ধাৰ কৰিছে ইন্দুশেখৰৰ পত্নীৰ মৃতদেহ।
বেংগালুৰুৰ ছেৰামপুৰাৰ বাসিন্দা ইন্দুশেখৰ। প্ৰাথমিক তদন্তত আৰক্ষীয়ে জানিব পাৰে যে তেওঁৰ পত্নী সুনীতাৰ সৈতে দীৰ্ঘদিন ধৰি মানসিকভাৱে বিকাৰগ্ৰস্ত হৈ আছিল। বিভিন্ন কাৰণত অহৰহ অশান্তিৰ সৃষ্টি হৈছিল। সুনীতাই বাৰে বাৰে দেউতাকৰ ঘৰত বৈবাহিক বিবাদৰ কথা অৱগত কৰিছিল।
যেতিয়াই অশান্তিৰ সৃষ্টি হৈছিল, তেতিয়াই তেওঁ শহুৰেকৰ ঘৰৰ পৰা ওলাই গৈছিল, যিটোত ইন্দুশেখৰ সুখী নাছিল। দেউতাকৰ ঘৰৰ মানুহে সুনীতাক ইন্ধন যোগাইছিল বুলি সন্দেহ কৰিছিল। সময়ৰ লগে লগে ইন্দুশেখৰৰ অসন্তুষ্টি বাঢ়ি আহে। আৰক্ষীৰ প্ৰাৰম্ভিক অনুমান যে সেই খঙৰ পৰাই হয়তো ইন্দুশেখৰে হত্যাকাণ্ড সংঘটিত কৰিছে। যদিও হত্যাকাণ্ডৰ আঁৰৰ প্ৰকৃত কাৰণ এতিয়াও স্পষ্ট হোৱা নাই।
আৰক্ষীৰ দাবী, সোধা-পোছাৰ সময়ত ইন্দুশেখৰে স্বীকাৰোক্তি দিয়ে যে তেওঁ প্ৰথমে পত্নী সুনীতাক হত্যা কৰে। ইয়াৰ পিছত ইন্দুশেখৰৰ বিৰুদ্ধে শাহুৱেক ৰূপৱতী, দুজন ভায়েক, তেওঁলোকৰ পত্নী আৰু সাত বছৰীয়া ভতিজাকক হত্যা কৰাৰ অভিযোগ উত্থাপন হৈছে।
তদন্তকাৰীৰ সূত্ৰ মতে, জেৰাৰ সময়ত অভিযুক্তই ১৫-২০ দিনৰ ভিতৰত এই সাতজন লোকক হত্যা কৰা বুলি জানিবলৈ দিয়ে। প্ৰথমে পত্নীক হত্যা কৰিছিল আৰু তাৰ পিছত তেওঁৰ মৃতদেহ পেলাই দিছিল। ইয়াৰ পিছত সিন্ধুশেখৰে এজন এজনকৈ শহুৰেকৰ ঘৰৰ মানুহ নিজৰ ঘৰলৈ মাতি আনি হত্যা কৰে। ইয়াৰ পিছত তেওঁ তেওঁলোকৰ মৃতদেহ নিজৰ টেক্সিত ভৰাই চহৰৰ বিভিন্ন ঠাইলৈ লৈ যায়।
তদন্তকাৰীৰ মতে, আৰক্ষীয়ে নিৰুদ্দেশ হোৱা ব্যক্তিৰ গোচৰৰ ভিত্তিত হত্যাকাণ্ডৰ তথ্য লাভ কৰে। বেংগালুৰু আৰক্ষী আয়ুক্ত সীমান্ত কুমাৰ সিঙে জানিবলৈ দিয়া মতে, সুনীতাৰ ভনীয়েকৰ পৰিয়ালৰ এজন সদস্যই থানাত তেওঁলোক নিৰুদ্দেশ হোৱাৰ খবৰ দিয়ে। সেই তথ্যৰ ভিত্তিত আৰক্ষীয়ে তালাচী অভিযান আৰম্ভ কৰে। ইয়াৰ পিছতে জানিব পৰা মতে, ছেৰামপুৰা অঞ্চলৰ এটা পৰিয়ালৰ ছয়জন সদস্য কেইবাদিনো ধৰি সন্ধানহীন হৈ আছিল।
ইয়াৰ পিছতে গম পোৱা যায় যে নিৰুদ্দিষ্ট ৬জনেই টেক্সিচালক ইন্দুশেখৰৰ ঘৰলৈ গৈছিল। আৰক্ষীয়ে তদন্ত আৰম্ভ কৰাৰ লগে লগে গম পায় যে ছয়জনক বেলেগ বেলেগ দিনত বিভিন্ন সময়ত ঘৰলৈ অহা দেখা গৈছিল। কিন্তু তাৰ পিছত কাৰো কোনো ধাৰণা নাছিল যে তেওঁলোক ক’লৈ গ’ল।
সেই তথ্যৰ ভিত্তিত আৰক্ষীয়ে প্ৰথমে ইন্দুশেখৰক গ্ৰেপ্তাৰ কৰে। জেৰা আৰম্ভ হোৱাৰ লগে লগে পোহৰলৈ আহে হত্যাকাণ্ড। আৰক্ষীৰ সূত্ৰ অনুসৰি, ইন্দুশেখৰে জেৰাৰ সময়ত দাবী কৰে যে তেওঁ প্ৰথমে সুনীতাক হত্যা কৰি চিক্কাবল্লাপুৰৰ নন্দন পাহাৰৰ সমীপত মৃতদেহ পেলাই দিছিল।
ইয়াৰ পিছত এজন এজনকৈ শহুৰেকৰ ঘৰৰ মানুহক মাতি আনি হত্যা কৰে। ইন্দুশেখৰৰ পৰা তথ্য লাভ কৰাৰ পিছতে চিক্কাবল্লাপুৰৰ নন্দন পাহাৰৰ পৰা সুনীতাৰ মৃতদেহ উদ্ধাৰ কৰে। অৱশ্যে বাকী মৃতদেহকেইটা ক’ত পেলাই দিয়া হৈছিল সেয়া এতিয়াও জানিব পৰা হোৱা নাই।
আৰক্ষীৰ সূত্ৰ অনুসৰি, ইন্দুশেখৰে জেৰাৰ সময়ত দাবী কৰে যে তেওঁ শহুৰেকৰ ঘৰৰ মানুহক এজন এজনকৈ ঘৰলৈ মাতি আনি তেওঁলোকৰ খাদ্যৰ লগত টোপনিৰ বড়ি মিহলাই দিছিল। খাদ্য খাই যেতিয়া তেওঁলোক অস্থিৰ হৈ পৰে, তেতিয়া তেওঁ সকলোকে শিলেৰে মূৰত থেতেলিয়াই মৰি পেলায়।
ইয়াৰ পিছত পত্নী আৰু তেওঁৰ পিতৃৰ পৰিয়ালৰ ছয়জন লোকৰ মৃতদেহ গাড়ীত ভৰাই চহৰৰ বিভিন্ন প্ৰান্তত পেলাই দিয়ে। ইন্দুশেখৰৰ নাবালিকা কন্যাই তেওঁক এই কামত সহায় কৰিছিল। সমগ্ৰ ঘটনাৰ তদন্তৰ বাবে আৰক্ষীয়ে তেওঁক গ্ৰেপ্তাৰ কৰিছে। ইন্দুশেখৰৰ এই দাবীৰ সত্যতা পৰীক্ষা কৰিবলৈ আৰক্ষীয়ে অধিক তদন্ত অব্যাহত ৰাখিছে।
