দিল্লীৰ নাংলী বিহাৰত খেলি থকা অৱস্থাত (Man hole Accident) মুকলি মেনহ’লত পৰে এটি চাৰি বছৰীয়া শিশু। তেওঁক বচাবলৈ কেইবাটাও সংস্থাৰ সহায়ত উদ্ধাৰ অভিযান আৰম্ভ কৰা হৈছে। দাস কলনীত ৰাষ্ট্ৰীয় দুৰ্যোগ সঁহাৰি বাহিনী (এনডিআৰএফ), দিল্লী অগ্নিনিৰ্বাপক বাহিনী (ডিএফএছ), দিল্লী আৰক্ষী, দিল্লী দুৰ্যোগ ব্যৱস্থাপনা কৰ্তৃপক্ষ (ডিডিএমএ) আৰু সীমান্ত সুৰক্ষা বাহিনীয়ে যৌথ অভিযান চলাই আছে। মঙলবাৰে নিশা শিশুটি এটা মেনহ’লত পৰে। অগ্নিনিৰ্বাপক বাহিনীয়ে দাবী কৰিছে যে নিশা প্ৰায় ৯.৪৫ বজাত তেওঁলোকলৈ ফোন আহে। খেলি থাকোঁতে এটা শিশু মেনহ’লত পৰা বুলি জানিবলৈ দিয়ে। এজন বিষয়াই কয়, “শিশুটোৱে মাকৰ সৈতে খেলি আছিল। মুকলি মেনহ’লটো লক্ষ্য নকৰাৰ বাবেই পৰি যায়। তেওঁ হয়তো মাটিৰ তলত নলাৰ ক’ৰবাত আবদ্ধ হৈ আছে। উদ্ধাৰৰ কাম চলি আছে, কিন্তু এতিয়াও তেওঁক পোৱা হোৱা নাই।”
পৰিয়ালৰ সূত্ৰ অনুসৰি, শিশুটিৰ নাম ইমৰাণ। পিতৃ খুৰ্ছিদ আলমে কয় যে তেওঁ সন্ধিয়া ওচৰৰ পাৰ্ক এখনত পত্নীৰ সৈতে খেলিবলৈ গৈছিল। হঠাৎ কিয় মেনহ’লৰ ফালে গ’ল বুলি সোধাত তেওঁ কয় যে শিশুটিয়ে প্ৰস্ৰাৱ কৰিবলৈ তালৈ গৈছিল। তেওঁ কয়, “মেনহ’লৰ মুখখন খোলা আছিল। আন্ধাৰত তেওঁ দেখা নাপালে। সেইবাবেই পিছলি পৰে।” মহকুমাধিপতি ৰজত মালহোত্ৰাই কয় যে খুৰ্ছিদৰ ফোন পোৱাৰ লগে লগে প্ৰশাসনে উদ্ধাৰ অভিযান আৰম্ভ কৰে।
সংবাদ সংস্থা এএনআইৰ সৈতে হোৱা এক সাক্ষাৎকাৰত তেওঁ কয়, “এনডিআৰএফৰ জোৱানৰ নেতৃত্বত এটা দলে শিশুটিক উদ্ধাৰৰ বাবে সকলো প্ৰচেষ্টা হাতত লৈছে। আমি যিকোনো নতুন তথ্য পোৱাৰ লগে লগে আপোনালোকক অৱগত কৰিম।” তেওঁ কয় যে চেকচন পাইপ আৰু বিশেষ স্কেনিং প্ৰযুক্তিৰ সহায়ত শিশুটি ক’ত আবদ্ধ হৈ আছে সেইটো জানিবলৈ প্ৰাৰম্ভিক প্ৰচেষ্টা চলোৱা হৈছে। যেতিয়া তেওঁৰ অৱস্থান জানিব পৰা যাব তেতিয়াহে উদ্ধাৰ অভিযান আৰম্ভ হ’ব।
