আজি প্ৰধানমন্ত্ৰী নৰেন্দ্ৰ মোদীৰ জন্মদিন। ৭২ বছৰীয়া হ’ল দেশৰ প্ৰধানমন্ত্ৰী। সেই উপলক্ষে বিজেপিয়ে আজি দেশজুৰি বিভিন্ন কার্যসূচী গ্ৰহণ কৰিছে। আনহাতে, প্ৰধানমন্ত্ৰীয়ে আজি জন্মদিন উপলক্ষে নামিবিয়াৰ পৰা অনা ৮টা চিতা মধ্যপ্ৰদেশৰ কুনু বনাঞ্চলত এৰি দিয়ে।
প্ৰধানমন্ত্ৰী নৰেন্দ্ৰ মোদীয়ে কেৱল নামিবিয়াৰ পৰা অনা চিতাৰ সৈতে জন্মদিন উদযাপন কৰাই নহয়, আজি সন্ধিয়া ৰাষ্ট্ৰীয় লজিষ্টিক নীতি ঘোষণা কৰিব। কেন্দ্ৰই দাবী কৰিছে যে যদিহে এই নীতি কাৰ্যকৰী কৰা হয় তেন্তে অনাগত দিনত দেশত সামগ্ৰী পৰিবহণৰ ভাবমূৰ্তি সলনি হʼব, লগতে পৰিবহণৰ ব্যয়ও এবাৰতে হ্ৰাস পাব।
অৱশ্যে বিৰোধীয়ে অভিযোগ কৰে যে তেওঁৰ জন্মদিনটো যাতে প্ৰচাৰৰ তুংগত থাকে তাৰ বাবে প্ৰধানমন্ত্ৰীয়ে মধ্যপ্ৰদেশৰ কুনু অভয়াৰণ্যত নামিবিয়াৰ পৰা অনা চিতা মুকলি কৰি দিয়াৰ সিদ্ধান্ত লৈছে। উল্লেখ্য, প্ৰায় সাত দশকৰ পিছত ভাৰতৰ বনাঞ্চললৈ ঘূৰি আহিছে চিতা। ফলত বিষয়টোৰ প্ৰতি সাধাৰণ ৰাইজৰ প্ৰবল আগ্ৰহ আছে।
বিৰোধীয়ে অভিযোগ কৰিছে যে প্ৰধানমন্ত্ৰীয়ে চিতাৰ দৰে বিষয়ত মনোনিৱেশ কৰি প্ৰচাৰ অভিযানৰ লাইমলাইট গ্ৰহণ কৰাৰ পৰিকল্পনা কৰিছে। আনহাতে, আজি কেন্দ্ৰই জনাইছে যে নতুন লজিষ্টিক নীতিৰ জৰিয়তে দেশৰ এটা মূৰৰ পৰা আনটো মূৰলৈ সহজে সামগ্ৰী পৰিবহণ কৰাটো সম্ভৱ হʼব।
ইয়াৰ ফলত সামগ্ৰী পৰিবহণৰ ব্যয় জিডিপিৰ ৮ শতাংশ হ্ৰাস পাব। উক্ত নীতিৰ ফলস্বৰূপে দেশৰ বিভিন্ন প্ৰান্তত কাৰ্গো টাৰ্মিনেল আৰু গুদাম ঘৰ নিৰ্মাণ কৰা হʼব, লগতে সামগ্ৰী পৰিবহণৰ ক্ষেত্ৰত বিভিন্ন ৰাজ্যৰ পৃথক কৰ ব্যৱস্থা আঁতৰাই এক সৰল কৰ ব্যৱস্থাও নিৰ্মাণ কৰা হʼব, যাতে ৰঙা ফিটাৰ মেৰপেচৰ সমস্যা হ্ৰাস কৰাটো সম্ভৱ হয়।
কেন্দ্রই কয় যে বিগত ৮ মাহৰ পৰা বিভিন্ন ৰাজ্যৰ লজিষ্টিক নীতিৰ ওপৰত আলোচনা কৰি ৰাষ্ট্রীয় নীতি প্রণয়ন কৰা হৈছে৷ এই নীতিৰ লক্ষ্য হৈছে বৰ্তমানৰ সামগ্ৰী পৰিবহণৰ ব্যয় কমেও পাঁচ শতাংশ হ্ৰাস কৰা। একে সময়তে ভাৰতে অহা ৮ বছৰৰ ভিতৰত লজিষ্টিক ডেভেলপমেণ্ট ইনডেক্সত বিশ্বৰ প্ৰথম ২৫ খন দেশৰ তালিকাত প্ৰৱেশ কৰাৰ পৰিকল্পনা কৰিছে।
