ৰাজধানী দিল্লীতত মৰ্মান্তিক দুৰ্ঘটনা। ট্ৰাকে থেতেলিয়াই থৈ গ’ল শুই থকা শ্ৰমিকক। ৪ জনৰ থিতাতে মৃত্যু হয়। সীমাপুৰী অঞ্চলত মঙলবাৰে নিশা প্ৰায় দুই বজাত সংঘটিত হয় এই ঘটনা। জানিব পৰা মতে, একাংশ প্ৰব্ৰজিত শ্ৰমিক পথ ডিভাইডাৰত শুই আছিল। এখন ট্ৰাকে হঠাতে নিয়ন্ত্ৰণ হেৰুৱাই তেওঁলোকক মহতিয়াই লৈ যায়। দুৰ্ঘটনা সংঘটিত কৰি লগে লগে ট্ৰাকখনে পলায়ন কৰে।
আৰক্ষীয়ে ট্ৰাকখন আৰু তাৰ চালকৰ সন্ধান আৰম্ভ কৰিছে। মৃতকৰ ভিতৰত কৰিম (৫২), ছোটে খান (২৫), শ্বাহ আলম (৩৮) আৰু ৰাহু (৪৫)। গুৰুতৰভাৱে আহত হৈ চিকিৎসালয়ত ভৰ্তি কৰোৱা হৈছে মনিষ (১৬) আৰু প্ৰদীপ (৩০)। আৰক্ষীৰ সূত্ৰ অনুসৰি, মঙলবাৰে পুৱা প্ৰায় ২ বজাত দিল্লীৰ সীমাপুৰীত ডিটিচি ডিপো চিগনেলৰ সমীপত সংঘটিত হয় এই দুৰ্ঘটনা।
সেই চিগনেলৰ ওচৰতে পথ ডিভাইডাৰত কিছু লোক শুই আছিল। ঠিক তেতিয়াই এখন ট্ৰাকে তীব্ৰ বেগেৰে আহি সিহঁতক খুন্দা মাৰিলে। আৰক্ষীয়ে ঘটনাৰ চিচিটিভিৰ ফুটেজ পৰীক্ষা কৰি আছে। একাধিক দলত বিভক্ত কৰি ট্ৰাকখন আৰু চালকজনক তালাচী চলাই আছে।
