ওড়িশা চৰকাৰ আৰু ৰে’ল মন্ত্ৰালয়ে ওড়িশা ৰে’ল দুৰ্ঘটনাত নিহত পৰিয়ালক ক্ষতিপূৰণ দিয়াৰ কথা ঘোষণা কৰে। ৰাজ্যৰ মুখ্যমন্ত্ৰী নবীন পাটনায়কে দুৰ্ঘটনাত নিহতসকলৰ পৰিয়াললৈ ‘গভীৰ শোক’ প্ৰকাশ কৰে। একে সময়তে শোকসন্তপ্ত পৰিয়ালসমূহক দুই লাখ টকা ক্ষতিপূৰণ দিয়াৰ কথা ঘোষণা কৰে।
মুখ্যমন্ত্ৰী সচিবালয়ৰ সূত্ৰ অনুসৰি, তেওঁ জিলা প্ৰশাসনক নিৰ্দেশ দিছে যে গুৰুতৰভাৱে আহতসকলে যাতে প্ৰয়োজনীয় চিকিৎসা লাভ কৰে। ৰাজ্যৰ দুৰ্যোগ ব্যৱস্থাপনা মন্ত্ৰী প্ৰমিলা মালিকক সেই স্থানলৈ যাবলৈ নিৰ্দেশ দিয়া হৈছে।
আনহাতে, ৰেʼল মন্ত্ৰী অশ্বিনী বৈষ্ণৱেও শোকসন্তপ্ত পৰিয়ালবৰ্গলৈ সমবেদনা জ্ঞাপন কৰে। ৰেʼল মন্ত্ৰালয়ে অৱগত কৰিছে যে নিহত পৰিয়ালক ৫০ লাখ টকাৰ ক্ষতিপূৰণ প্ৰদান কৰা হʼব। গুৰুতৰভাৱে আহতসকলক ২ লাখ টকাৰ ক্ষতিপূৰণ দিয়া হʼব। সামান্যভাৱে আঘাতপ্ৰাপ্তসকলে ২৫ হাজাৰ টকাৰ ক্ষতিপূৰণ লাভ কৰিব।
উল্লেখ্য, ওড়িশাৰ ভদ্ৰক ৰে’ল বিভাগৰ কোৰাই ষ্টেচনত সোমবাৰে পুৱা এখন মালবাহী ৰে’ল ৰে’লপথৰ পৰা ওলাই যায়। তাৰ পিছত ইয়াৰ পয়ত্ৰিশটা ডবাৰ ভিতৰত ৮টা ডবা প্লেটফৰ্মলৈ উঠি যায়। এই ঘটনাত ৩ জন লোকৰ মৃত্যু হয়। আহত হয় ২ জন।
ইষ্ট কোষ্ট ৰেʼলৱেৰ এক অধিসূচনা অনুসৰি সোমবাৰে পুৱা ৬.৫৪ বজাত ওড়িশাৰ ভদ্ৰক-কাপিলাছ ৰোড ৰেʼল অংশৰ কোৰাই ষ্টেচনত এখন মালবাহী ৰেʼল ৰে’লপথৰ পৰা ওলাই যায়। ৰেʼলৰ আঠটা ডবা কোৰাই ষ্টেচনত এটা প্লেটফৰ্মত উঠে। জাজপুৰৰ আৰক্ষী অধীক্ষকে সংবাদ সংস্থাক জনোৱা মতে, এই ঘটনাত ৩ জন লোকৰ মৃত্যু হৈছে।
লগে লগে উদ্ধাৰৰ কাম আৰম্ভ হয়। হতাহতৰ সংখ্যা বৃদ্ধি পাব পাৰে বুলি আশংকা কৰা হৈছে। ৰেʼলৱেৰ তথ্য অনুসৰি, দুৰ্ঘটনাৰ সময়ত ভুৱনেশ্বৰ অভিমুখী এখন স্থানীয় ৰেʼল ধৰিবলৈ বিশজন যাত্ৰী প্লেটফৰ্মত থিয় হৈ আছিল। সেই সময়ত গাড়ীখনে নিয়ন্ত্ৰণ হেৰুৱাই প্লেটফৰ্মত উঠি যায়।
এই আঘাতৰ বাবেই ষ্টেচনৰ অভাৰব্ৰিজত মালবাহী গাড়ীখনৰ এটা ডবা ওপৰলৈ উঠি যায়। স্থানীয় ৰাইজে প্ৰাৰম্ভিক উদ্ধাৰকাৰ্য আৰম্ভ কৰে। ততাতৈয়াকৈ আহতসকলক স্থানীয় চিকিৎসালয়লৈ প্ৰেৰণ কৰা হয়। ৰেʼল বিভাগৰ এগৰাকী বিষয়াই জনোৱা মতে, ৰেʼলৱেৰ চিকিৎসা দলটোক শীঘ্ৰে উক্ত স্থানত উপস্থিত হʼবলৈ নিৰ্দেশ দিয়া হৈছে। উক্ত স্থানলৈ ৰাওনা হৈছে ৰেʼলৱেৰ বিভাগীয় পৰিচালক।
ৰে’লপথৰ পৰা ওলাই যোৱা মালবাহী ৰেʼলখন আঁতৰাই নিদিয়ালৈকে সেই সংমণ্ডলৰ ৰেʼল সেৱা ব্যাহত হোৱাৰ সম্ভাৱনা আছে। এই দুৰ্ঘটনাৰ বাবে হাওৰা-ভুৱনেশ্বৰ জনশতাব্দী এক্সপ্ৰেছ, হাওৰা-পুৰী শতাব্দী এক্সপ্ৰেছ, শালীমাৰ-পুৰী এক্সপ্ৰেছ, পুৰি-শালিমাৰ এক্সপ্ৰেছকে ধৰি কেইবাখনো ৰেʼল বাতিল কৰা হৈছে।
কিছুমান ৰে’লৰ যাত্ৰা চুটি কৰা হৈছে। ভুৱনেশ্বৰ-হাওৰা জনশতাব্দী এক্সপ্ৰেছ জাজপুৰত উপস্থিত হʼব। বাতিল কৰা হৈছে ডাউন জনশতাব্দী এক্সপ্ৰেছ। কিছুমান ৰেʼলৰ পথ সলনি কৰি জাখপুৰা-জাৰোলি-টাটা হৈ পথ সলনি কৰা হৈছে। ঝাৰসুগুড়াৰ মাজেৰেও একাংশ ৰেʼল পথ সলনি কৰা হʼব।
