অহা ১৪ এপ্ৰিলত অসমৰ বিভিন্ন প্ৰান্তৰ এঘাৰ হেজাৰ নাচনীৰ দ্বাৰা বিহু প্ৰদৰ্শন কৰি গীনিজ বুক অৱ ৱৰ্ল্ড ৰেকৰ্ড (Guinness World Record) কৰিবৰ কাৰণে অসম চৰকাৰে অভিলাষী আঁচনি গ্ৰহণ কৰিছে। এই আঁচনিক সমগ্ৰ অসমবাসীয়ে আদৰণী জনাইছে।
আৰু ইতিপূৰ্বে বিভিন্ন ক্ষেত্ৰত ৰাষ্ট্ৰীয়, আন্তঃৰাষ্ট্ৰীয় অভিলেখকাৰী সকলে এই মুহূৰ্ত্তত অসম চৰকাৰলৈ এক বিশেষ আহ্বান জনাইছে। অসমৰ বিভিন্ন প্ৰান্তৰ ৰাষ্ট্ৰীয়, বিশ্ব অভিলেখকাৰী সকলে অসম চৰকাৰলৈ সময়ে সময়ে জনাই অহা তেওঁলোকৰ বিভিন্ন দাবী সন্দৰ্ভত চৰকাৰে কোনো পদক্ষেপ গ্ৰহণ নকৰাৰ পৰিপ্ৰেক্ষিতত ক্ষোভ প্ৰকাশ কৰি আজি গুৱাহাটীত এক সংবাদমেলত প্ৰকাশিত ১০ দফীয়া প্ৰেছ বিজ্ঞপ্তিৰ জৰিয়তে তেওঁলোকৰ ক্ষোভ আৰু চৰকাৰক জনোৱা দাবী পুনৰবাৰ সদৰি কৰে। অল আচাম ৰেকৰ্ড হ’ল্ডাৰ এচচিয়েচনৰ হৈ নীলিমা বৰ্মন (ইণ্ডিয়া বুক অৱ ৰেকৰ্ড অভিলেখকাৰী) আৰু অনিন্দিতা দত্ত তামুলীয়ে (গীনিজ, ইণ্ডিয়া, লিমকা স্পেন্দলি চুপাৰ ৱমেন) সংবাদ মেলত অভিলেখকাৰী সকলৰ ত্যাগ, দুখ, ক্ষোভ সমূহ সদৰি কৰে।
ক্ৰমে গণেশ বৰা (ইণ্ডিয়া, এচিয়া, লিমকা ৱৰ্ল্ড ৰেকৰ্ড অভিলেখকাৰী), ভূপেন চন্দ্ৰ দাস (ইণ্ডিয়া, ৫ বাৰকৈ এচিষ্ট ৱৰ্ল্ড ৰেকৰ্ড অভিলেখকাৰী আদি), ৰবীন বাৰ (অসম, ইণ্ডিয়া, গীনিজ ৱৰ্ল্ড ৰেকৰ্ড), গীতালি দাস (গীনিজ বুক অফ ৱৰ্ল্ড ৰেকৰ্ড), ৰিদিপ শইকীয়া (ইণ্ডিয়া, এচিয়া, ইউনিক ৱৰ্ল্ড ৰেকৰ্ড), প্ৰদীপ বৰা (ইণ্ডিয়া বুক অফ ৰেকৰ্ড), পিংকু দত্ত (ইণ্ডিয়া বুক অফ ৰেকৰ্ড), প্ৰাঞ্জল দত্ত (ইণ্ডিয়া বুক অফ ৰেকৰ্ড), সুভাষ মেধি (ইণ্ডিয়া, গীনিজ বুক অফ ৱৰ্ল্ড ৰেকৰ্ড) উপস্থিত থকা আৰু স্বাক্ষৰিত প্ৰেছ বিজ্ঞপ্তিখনত আক্ষেপ কৰে যে যদিও অসমৰ অভিলেখকাৰী সকলে ব্যক্তিগত ধন খৰচ কৰি নিজ কষ্ট আৰু সাধনাৰে ৰাষ্ট্ৰীয়, এচিয়ান আৰু গীনিজ ৱৰ্ল্ড ৰেকৰ্ড আদি অভিলেখ কৰিলে, তথাপিও চৰকাৰৰ তৰফৰ পৰা কোনোধৰণৰ ফলাফল পোৱা নগ’ল। লগতে তেখেতসকলে বহুবাৰ সংবাদ মাধ্যমৰ দ্বাৰা তেওঁলোকৰ ব্যক্তিগত সমস্যা সমূহ চৰকাৰক জনাইছে। সেয়েহে এই সংবাদমেলৰ জৰিয়তে অভিলেখকাৰী সকলে নিজৰ দুখ দুৰ্দশা প্ৰকাশ কৰিব বিচাৰিছে।
এই বিজ্ঞপ্তিৰ জৰিয়তে উজনিৰ পৰা নামনিলৈ বিভিন্ন প্ৰান্তৰ দুখীয়া নিবনুৱা অভিলেখকাৰী সকলক দয়া-কৃপা দৃষ্টিৰে চাই অভিজ্ঞতা অনুসৰি কোনো সংস্থাপন দিবলৈ তেওঁলোকে চৰকাৰলৈ অনুৰোধ কৰে। লগতে অভিলেখকাৰী সকলৰ চাৰ্টিফিকেটৰ যদি কোনো মৰ্যদাই নাই, তেন্তে অভিলেখ কৰি কি লাভ হ’ব বুলি উল্লেখ কৰি চৰকাৰে অভিলেখকাৰী সকলক দমিনেট কৰি ৰাখিছে ৰাখিছে বুলিও ক্ষোভ প্ৰকাশ কৰে।
‘চৰকাৰে আমাৰ সংস্কৃতি বিহুক লৈ অভিলেখ গঢ়িলে আমি বেয়া নাপাওঁ’ বুলি উল্লেখ কৰি ব্যক্তিগত আৰু চৰকাৰী অভিলেখৰ মাজত পাৰ্থক্য কি থাকিব বুলিও প্ৰশ্ন কৰে। লগতে ব্যক্তিগত ধন আৰু যোগ্যতাৰ বিনিময়ত গঢ়া অভিলেখৰ দায়িত্ব আৰু মহত্ব সন্দৰ্ভতো প্ৰশ্নৰ অৱতাৰণা কৰে। অভিলেখকাৰী সকলে বিজ্ঞপ্তিখনত আৰু উল্লেখ কৰে যে ৰাষ্ট্ৰীয় আৰু আন্তঃৰাষ্ট্ৰীয় অভিলেখ গঢ়ি তেওঁলোকে লণ্ডন বিশ্ববিদ্যালয়ৰ পৰা পি এইচ ডি ডিগ্ৰীও ল’ব পৰা নাই।
সেয়েহে এই বিজ্ঞপ্তিৰ জৰিয়তে জনোৱা দাবীৰ প্ৰতি সঁহাৰি দি চৰকাৰে পদক্ষেপ ল’বলৈ দাবী জনায়। আৰু এই দাবীৰ প্ৰতি সঁহাৰি জনাই পদক্ষেপ নল’লে পৰৱৰ্তী পৰ্যায়ত দেশৰ প্ৰধানমন্ত্ৰী নৰেন্দ্ৰ মোদীলৈ (Narendra Modi) এই প্ৰস্তাৱ দাখিল কৰাৰ লগতে বিশ্ব দৰবাৰতো তাক আঙুলিয়াই দিয়াৰ বিষয়ে চৰকাৰক সতৰ্ক কৰি দিয়ে।
