Kerala Tourist Boat Tragedy I কেৰালাত পৰ্যটকভৰ্তি নাও ডুবি কমেও ২২ জন লোকৰ মৃত্যু

কেৰালাত (Kerala) পৰ্যটক কঢ়িয়াই নিয়া হাউচবোট ডুব যোৱাৰ (Tourist Boat Tragedy) ফলত কমেও ২২ জন লোকৰ মৃত্যু হয়। মৃতকৰ ভিতৰত অধিকাংশই শিশু। দেওবাৰে সন্ধিয়া কেৰালাৰ মালাপ্পুৰম (Malappuram) জিলাত সংঘটিত হয় এই ঘটনা। এই খবৰ সংবাদ সংস্থা এএনআয়ে প্ৰকাশ কৰিছে। বহুতেই হাউচবোটৰ তলত আবদ্ধ হৈ আছে। উদ্ধাৰৰ কাম পূৰ্ণগতিত চলি আছে।

দেওবাৰে সন্ধিয়া ৭ বজাত থুভাল থিৰাম পৰ্যটনস্থলীত সংঘটিত হয় এই ঘটনা। উক্ত হাউচবোটখনত প্ৰায় ৪০ জন যাত্ৰী আছিল বুলি দাবী কৰা হৈছে। উদ্ধাৰৰ কাম আৰম্ভ হৈছে। ঘটনাস্থলীত উপস্থিত হয় আৰক্ষী আৰু অগ্নিনিৰ্বাপক বাহিনী। স্থানীয় লোকেও উদ্ধাৰ কামত সহায় কৰে। ঘটনাস্থলীত‌ উপস্থিত হয় কেৰালাৰ পৰ্যটন মন্ত্ৰী মহম্মদ ৰিয়াছ।

দেওবাৰে নিশা প্ৰধানমন্ত্ৰী নৰেন্দ্ৰ মোডীয়ে টুইট কৰি কেৰালাৰ দুৰ্ঘটনাক লৈ শোক প্ৰকাশ কৰে। তেওঁ মৃতকৰ পৰিয়াললৈ সমবেদনা জ্ঞাপন কৰে। ইমানখিনি প্ৰাণহানি হোৱাত শোক প্ৰকাশ কৰে প্ৰধানমন্ত্ৰীয়ে। ইয়াৰ সমান্তৰালকৈ তেওঁ মৃতকৰ পৰিয়ালক ২ লাখ টকা ক্ষতিপূৰণ দিয়াৰ কথাও ঘোষণা কৰে। এই ধন প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ পৰা দিয়া হʼব।

কেৰালাৰ মুখ্যমন্ত্ৰী পিনাৰায় বিজয়নেও এই দুৰ্ঘটনাক লৈ শোক প্ৰকাশ কৰে। তেওঁ মালাপ্পুৰমৰ জিলা দণ্ডাধীশক দুৰ্যোগ সঁহাৰি বাহিনীৰ সৈতে সকলো ধৰণৰ সহযোগিতা আগবঢ়াবলৈ নিৰ্দেশ দিয়ে। সোমবাৰে পুৱাতেই তেওঁ দুৰ্ঘটনাস্থলীত উপস্থিত হয়। পুৱা মুখ্যমন্ত্ৰীয়ে বাতিল কৰে চৰকাৰী কাৰ্যসূচীও।