অসমৰ ডিটেনচন শিবিৰ (Detention camps in Assam)ত পর্যাপ্ত আন্তঃগাঁথনিৰ অভাৱ (Lack of infrastructure) সন্দৰ্ভত ছুপ্রিম কোর্ট (Suprem Court)ত চলি থকা গোচৰ সন্দৰ্ভত সোমবাৰে শুনানিত অসম চৰকাৰক সময়সীমা বান্ধি দিলে দেশৰ শীর্ষে আদালত। ন্যায়াধীশ অভয় এছ একা আৰু অগাষ্টিন জর্জ মাচিহৰ বিচাৰপীঠে এক মাহৰ ভিতৰত ডিটেনচন শিবিৰবোৰত পর্যাপ্ত আন্তঃগাঁথনি নিশ্চিত কৰিবলৈ শুনানিত নিৰ্দেশ দিয়ে।
আনহাতে, ৰাজ্য চৰকাৰৰ প্রতিনিধি দলক এই শিবিৰবোৰ পৰিদর্শন আৰু সংশ্লিষ্ট সকলো পক্ষৰ সৈতে আলোচনাৰো নিৰ্দেশ দিছে ছুপ্রিম কোর্টে। উল্লেখ্য যে নাগৰিকত্বৰ সন্দেহ থকা বা ‘ফৰেইনাৰ্ছ ট্রিবুনেল’-এ অবৈধ নাগৰিক বুলি ভবাসকলক আটক কৰাৰ পিছত এই ডিটেনচন শিবিৰত ৰখা হয়। কিন্তু এই শিবিৰবোৰত পর্যাপ্ত আন্তঃগাঁথনি নাই বুলি বাৰম্বাৰ অভিযোগ উত্থাপন হৈ আহিছে।
আনহাতে, বিগত জুলাই মাহতো এই সন্দৰ্ভত শীর্ষ আদালতৰ দুজনীয়া ন্যায়াধীশৰ বিচাৰপীঠে অসম চৰকাৰ সতৰ্ক কৰি দিছিল। পর্যাপ্ত পানী আৰু অনাময় ব্যৱস্থাৰ অভাৱৰ কথা উল্লেখ কৰিছিল শীর্ষ ন্যায়ালয়ে। আনকি খাদ্য আৰু চিকিৎসা ব্যৱস্থাক লৈয়ো কোনো স্পষ্ট ধাৰণা নাই বুলিও উচ্চতম ন্যায়ালয়ে জনাইছিল।
সোমবাৰে গোচৰৰ শুনানিৰ সময়ত পুনৰ ডিটেনচন শিবিৰৰ পৰিস্থিতিক লৈ অসন্তুষ্টি প্রকাশ কৰে ন্যায়াধীশ একাই। তেওঁ কয়, “ডিটেনচন শিবিৰবোৰৰ অৱস্থায় সন্তুষ্টি প্রকাশৰ কোনো অৱকাশ নাই। ৰাজ্যৰ ন্যায়িক সেৱাৰ ৰিপোর্ট অনুযায়ী ন্যূনতম স্বাস্থ্য ব্যৱস্থাৰো অভাৱ আছে। মহিলা চিকিৎসকো তাত নাই। পর্যাপ্ত আন্তঃগাঁথনি চৰকাৰে নিশ্চিত কৰিব লাগিব।” আনহাতে, চৰকাৰৰ সৈতে সংশ্লিষ্ট সকলো পক্ষৰ বৈঠকৰ সময়ত ৰাজ্যৰ ন্যায়িক সেৱা কর্তৃপক্ষকো উপস্থিত থকাৰ নির্দেশ দিছে শীর্ষ আদালতে। উক্ত বৈঠকৰ পিছত অহা ৯ ডিচেম্বৰত আইনী সেৱা কর্তৃপক্ষক আদালতত ৰিপোর্ট দাখিলৰ নির্দেশ দিয়া হৈছে।
