বাওঁপন্থীশাসিত কেৰালাত বাংলাদেশী (Bangladeshi in Kerala) বুলি সন্দেহ কৰি এজন প্ৰব্ৰজিত শ্ৰমিকক (Migrant worker) প্ৰহাৰ কৰি হত্যা কৰাৰ অভিযোগ (Allegation of murder)। যোৱা সপ্তাহত কেৰালাৰ পালাক্কাড়ত সংঘটিত হয় এই ঘটনা। ইতিমধ্যে পিনাৰায় বিজয়ন চৰকাৰে মৃত শ্ৰমিকজনৰ পৰিয়াললৈ ১০ লাখ টকাৰ আৰ্থিক সাহায্য প্ৰদানৰ কথা ঘোষণা কৰিছে। লগতে দোষীক আইনী শাস্তি প্ৰদানৰ আশ্বাস দিয়া হৈছে।
মৃত প্ৰব্ৰজিত শ্ৰমিকজনৰ নাম ৰামনাৰায়ণ বাঘেল (৩১)। ছত্তীশগড় শক্তি জিলাৰ বাসিন্দা ৰামনাৰায়ণৰ আঠ আৰু দহ বছৰীয়া দুজন পুত্ৰ আছে। ঘটনাটোৰ মাত্ৰ চাৰিদিন পূৰ্বে তেওঁ কামৰ সন্ধানত পলাক্কাড়লৈ গৈছিল। ১৭ ডিচেম্বৰত আত্মীয়ৰ সৈতে ৰাস্তালৈ ওলাই গৈছিল। তাৰ পিছত ৱালয়া আৰক্ষী থানাৰ অন্তৰ্গত আট্টাপল্লামৰ ওচৰত তেওঁ বাট হেৰুৱায়। ৰামনাৰায়ণৰ আচৰণ দেখি গাঁৱৰ মানুহে তেওঁক ঘেৰি ধৰে আৰু তেওঁক ‘চোৰ’ বুলি সন্দেহ কৰি সোধা-পোছা কৰিবলৈ ধৰে। কি নাম, ক’ৰ পৰা আহিছে, মাতৃভাষা কি এইবোৰ প্ৰশ্ন তেওঁক সুধিবলৈ ধৰে। ইফালে উপস্থিত থকা ৰাইজৰ এটা অংশই শ্ৰমিকজনক ‘বাংলাদেশী’ আখ্যা দি মাৰপিট কৰিবলৈ ধৰে। এই ঘটনাৰ ভিডিঅ’ ছ’চিয়েল মিডিয়াতো ভাইৰেল হৈছে।
৩১ ছেকেণ্ডৰ এই ভিডিঅ’টোত ৰামনাৰায়ণক মাটিত বহি থকা দেখা গৈছে। তেওঁক ঘেৰি ধৰিছে গাঁৱৰ মানুহে। সকলোৱে শ্ৰমিকজনক এটাৰ পিছত এটাকৈ প্ৰশ্ন কৰি আছে। ভিডিঅ’টোত বাকীসকলে বাৰে বাৰে ৰামনাৰায়ণক ‘বাংলাদেশী’ বুলি কোৱা শুনা গৈছে। গণ আক্ৰমণত ব্যক্তিজন প্ৰায় অচেতন হৈ পৰাৰ পিছতো কোনোৱেই থমকি ৰোৱা নাই। গুৰুতৰভাৱে আহত অৱস্থাত তেওঁক উদ্ধাৰ কৰি পলাক্কাড় জিলা চৰকাৰী চিকিৎসালয়লৈ লৈ যোৱা হয়। তাতে একাধিক আঘাত আৰু ৰক্তক্ষয়ৰ বাবে নিশা তেওঁৰ মৃত্যু হয়। ঘটনাৰ তদন্তৰ বাবে আৰক্ষীয়ে এটা বিশেষ দল গঠন কৰিছে। এই পৰ্যন্ত ৫জন লোকক গ্ৰেপ্তাৰ কৰা হৈছে। বাকীসকলৰো সন্ধান অব্যাহত আছে। মৃত শ্ৰমিকজন দলিত বুলি বিভিন্ন পক্ষৰ পৰা দাবী উত্থাপন হৈছে। তদন্তও অব্যাহত ৰাখিছে আৰক্ষীয়ে।
ইফালে কেৰালাৰ বাওঁপন্থী চৰকাৰে এই ঘটনাক তীব্ৰ গৰিহণা দিছে। দেশত ‘ঘৃণাৰ ৰাজনীতি প্ৰচাৰ কৰা’ বুলি ৰাষ্ট্ৰীয় স্বয়ংসেৱক সংঘ আৰু বিজেপিক আক্ৰমণ কৰে। পালাক্কাড়ৰ চি পি এম নেতা তথা ৰাজ্যিক মন্ত্ৰী এম বি ৰাজেশে কয়, “সংঘ পৰিয়ালৰ ঘৃণা আৰু জাতিগত বিদ্বেষৰ ৰাজনীতিৰ বলি হৈছে প্ৰব্ৰজিত শ্ৰমিকজন। বাংলাদেশী বুলি সন্দেহত ৰাইজে তেওঁক আক্ৰমণ কৰে। আক্ৰমণকাৰীৰ ভিতৰত কেইবাজনো আৰ এছ এছ কৰ্মীও আছিল। ইয়াৰে বহুতৰে বিৰুদ্ধে বিভিন্ন অপৰাধমূলক গোচৰ আছে।” ৰামনাৰায়ণৰ মৃতদেহ বিমানযোগে ছত্তীশগড়লৈ প্ৰেৰণ কৰাৰ ব্যৱস্থা কৰিছে চৰকাৰে। তদুপৰি ৰাজ্য চৰকাৰে মৃত শ্ৰমিকজনৰ পৰিয়াললৈ ১০ লাখ টকাৰ আৰ্থিক সাহায্যও ঘোষণা কৰিছে।
