ভাৰতে পাকিস্তানক ‘ফ্ৰেংকেনষ্টাইন ৰাষ্ট্ৰ’ বুলি অভিহিত কৰিছে। শুকুৰবাৰে ইছলামাবাদক সন্ত্ৰাসবাদক সমৰ্থন কৰাৰ অভিযোগ উত্থাপন কৰি ৰাষ্ট্ৰসংঘত ভাৰতৰ স্থায়ী মিছনৰ প্ৰথম সচিব অনুপমা সিঙে কয়, “দেশখনক এতিয়া নিজে তৈয়াৰ কৰা দানৱে (সন্ত্রাসবাদী) কামুৰিছে৷’
পাকিস্তানী প্ৰতিনিধিয়ে জম্মু-কাশ্মীৰৰ বিষয়টো উত্থাপন কৰাৰ উত্তৰত অনুপমাই দিয়া প্ৰত্যুত্তৰত অভিযোগ উত্থাপন কৰে যে ইছলামাবাদে সন্ত্ৰাসবাদীক ধাৰাবাহিকভাৱে আশ্ৰয়, প্ৰশিক্ষণ আৰু বিভিন্ন সাহায্য প্ৰদান কৰি আহিছে।
তেওঁ কয়, “জম্মু-কাশ্মীৰ ভাৰতৰ অবিচ্ছেদ্য অংগ আছিল, আছে আৰু থাকিব। একমাত্ৰ অমীমাংসিত সমস্যাটো হ’ল পাকিস্তানে ভাৰতৰ ভূখণ্ড অবৈধভাৱে দখল কৰা।” পাকিস্তান অধিকৃত কাশ্মীৰৰ ৰাৱালকোটত সংঘটিত হিংসা আৰু দমনৰ কথা উল্লেখ কৰি তেওঁ পাকিস্তান চৰকাৰ আৰু সেনাৰ বিৰুদ্ধে মানৱ অধিকাৰ উলংঘাৰ অভিযোগ উত্থাপন কৰে।
চলিত মাহৰ আৰম্ভণিৰে পৰা পাকিস্তান অধিকৃত কাশ্মীৰত আৰম্ভ হৈছে প্ৰতিবাদ। পাকিস্তান অধিকৃত কাশ্মীৰৰ নাগৰিক সমাজৰ সংগঠন ‘জইণ্ট আৱামী একচন কমিটী’-এ অঞ্চলটোৰ নিৰাপত্তা বাহিনীৰ অৰ্থনৈতিক দুৰ্দশা আৰু অত্যাচাৰৰ বিৰুদ্ধে প্ৰতিবাদ সাব্যস্ত কৰিছে। শেহতীয়াকৈ প্ৰশাসনে সংগঠনটোক নিষিদ্ধ কৰিছিল।
তেতিয়াৰে পৰা বিক্ষোভ আৰু প্ৰতিবাদ বাঢ়িছে। ইয়াৰ সমান্তৰালকৈ পাকিস্তানী সেনা আৰু ৰেঞ্জাৰৰ আক্ৰমণো বৃদ্ধি পাইছে। অভিযোগ অনুসৰি, এতিয়ালৈকে নিৰ্বিচাৰ গুলীচালনাত এশৰো অধিক সাধাৰণ নাগৰিকৰ মৃত্যু হৈছে।
সেই বিষয়টো উত্থাপন কৰি অনুপমাই কয়, “ৰাৱালকোটৰ এই ট্ৰেজেডী, শতাধিক সাধাৰণ নাগৰিকৰ হত্যা আৰু পাকিস্তান অধিকৃত কাশ্মীৰত হোৱা নৃশংস দমন আচলতে ইয়াৰ আশা কৰা ধৰণৰ পৰিণতি। কাৰণ ই বলপূৰ্বক দখলৰ ওপৰত ভিত্তি কৰি গঢ় লৈ উঠিছে। দমন চলাই শাসন ব্যৱস্থা অব্যাহত ৰাখিছে।”
