ভাৰতীয় কোটিপতি গৌতম আদানীৰ (Gautam Adani) বিৰুদ্ধে উত্থাপিত জালিয়াতি আৰু উৎকোচৰ অভিযোগ (Bribery accusation) উঠাই লোৱাৰ সিদ্ধান্ত লৈছে আমেৰিকাৰ ন্যায় বিভাগে। ব্লুমবাৰ্গৰ শেহতীয়া চাঞ্চল্যকৰ প্ৰতিবেদনৰ উদ্ধৃতি দি ফ’ৰ্বছে প্ৰকাশ (The Forbes Publication) কৰিছে যে আমেৰিকাই আদানীৰ বিৰুদ্ধে থকা ফেডাৰেল জালিয়াতিৰ অভিযোগ আনুষ্ঠানিকভাৱে বাদ দিয়াৰ ঠিক আগতে আদানী গ্ৰুপৰ মুৰব্বী গৌতম আদানীয়ে ভাৰতৰ আহমেদাবাদত আমেৰিকাৰ ৰাষ্ট্ৰপতিৰ পুত্ৰ ড’নাল্ড ট্ৰাম্প জুনিয়ৰ (Son Donald Trump Jr.)ৰ সৈতে এক অতি গোপনীয় আৰু ব্যক্তিগত বৈঠকত মিলিত (Met in a confidential and private meeting) হয়। এই চাঞ্চল্যকৰ তথ্য পোহৰলৈ অহাৰ লগে লগে আমেৰিকাৰ ৰাজনৈতিক আৰু আইনী মহলত প্ৰভাৱ পেলোৱা আৰু পক্ষপাতিত্বৰ গুৰুতৰ অভিযোগ উত্থাপন হ’বলৈ ধৰে।
উল্লেখ্য যে ২০২৪ চনৰ নৱেম্বৰ মাহত নিউয়ৰ্কৰ ব্ৰুকলিনৰ এখন ফেডাৰেল আদালতে আদানী গ্ৰীণ এনাৰ্জী লিমিটেডৰ শীৰ্ষ কাৰ্যবাহীসকলৰ বিৰুদ্ধে এক বৃহৎ বিত্তীয় কেলেংকাৰীৰ অভিযোগ উত্থাপন কৰিছিল। আমেৰিকাৰ ন্যায় বিভাগে অভিযোগ কৰে যে গৌতম আদানী আৰু তেওঁৰ সহযোগীসকলে ভাৰত চৰকাৰৰ বিষয়াসকলক প্ৰায় ২৫ কোটি ডলাৰৰ উৎকোচ দিয়াৰ পৰিকল্পনা কৰিছিল আৰু ভাৰতত এটা বৃহৎ সৌৰশক্তি প্ৰকল্পৰ চুক্তি লাভৰ বাবে আমেৰিকাৰ বিনিয়োগকাৰীক সম্পূৰ্ণ ভুৱা তথ্য প্ৰদান কৰিছিল।
এই সন্দৰ্ভত আমেৰিকাৰ উৎকোচ বিৰোধী আইন বা বিদেশী দুৰ্নীতিগ্ৰস্ত প্ৰথা আইনৰ (এফচিপিএ) অধীনত আদানীৰ বিৰুদ্ধে অপৰাধমূলক গোচৰ ৰুজু কৰা হৈছিল। কিন্তু ৰাজনৈতিক পৰিৱৰ্তনৰ পিছত আৰু আদানীৰ সৈতে ট্ৰাম্প জুনিয়ৰৰ বৈঠকৰ মাত্ৰ সাত মাহৰ পিছতে ২০২৫ চনৰ মে’ মাহত আমেৰিকাৰ ন্যায় বিভাগে আদানীৰ বিৰুদ্ধে থকা সকলো অভিযোগ হঠাতে উঠাই লয়। এক চমু আবেদনত অভিযুক্তসকলে কয় যে তেওঁলোকে গোচৰটো পুনৰীক্ষণ কৰিছে আৰু তেওঁলোকৰ বিবেচনা অনুসৰি এই অপৰাধমূলক গোচৰটোৰ বাবে কোনো অতিৰিক্ত ৰাজ্যিক সম্পদ ব্যয় নকৰাৰ সিদ্ধান্ত লৈছে।
আমেৰিকাৰ ন্যায় বিভাগৰ এই হঠাৎ আৰু নাটকীয় সিদ্ধান্তই আদানীৰ মালিকানাধীন কোম্পানীসমূহৰ শ্বেয়াৰ বজাৰত অভূতপূৰ্ব উত্থানৰ সূচনা কৰি সাময়িকভাৱে তেওঁক এছিয়াৰ আটাইতকৈ ধনী ব্যক্তিজনৰ সিংহাসনলৈ উভতাই আনিছে। ফলত ট্ৰাম্প জুনিয়ৰৰ সৈতে পূৰ্বৰ এই বৈঠকৰ সৈতে আদানীৰ ভাগ্যৰ পৰিৱৰ্তনৰ সৈতে কোনো প্ৰত্যক্ষ সম্পৰ্ক আছে নেকি সেই সন্দৰ্ভত ইতিমধ্যে তীব্ৰ চৰ্চা হৈছে। যদিও ট্ৰাম্প জুনিয়ৰৰ এগৰাকী মুখপাত্ৰই সংবাদ মাধ্যমৰ আগত দাবী কৰিছে যে ন্যায় বিভাগে গোচৰটো প্ৰত্যাহাৰ কৰাৰ সিদ্ধান্তৰ এই ব্যক্তিগত বৈঠকৰ সৈতে ‘কোনো সম্পৰ্ক নাই’ আৰু সমগ্ৰ বিষয়টোক সম্পূৰ্ণ কাকতলীয়া বুলি উলাই কৰিছে। তথাপিও আন্তঃৰাষ্ট্ৰীয় ৰাজনৈতিক পৰ্যবেক্ষকৰ মতে এই গোপন বৈঠকৰ খবৰ ফাদিল হোৱাৰ পিছত আমেৰিকাৰ ন্যায়িক ব্যৱস্থাৰ নিৰপেক্ষতা আৰু বৃহৎ কৰ্প’ৰেটৰ সৈতে ৰাজনৈতিক প্ৰভাৱশালী লোকৰ গোপন বুজাবুজিৰ বিষয়টোৱে পুনৰ বিশ্বৰ মঞ্চত এক নতুন বিতৰ্কৰ সূচনা কৰিছে।
