এখন চলন্ত বাছত অগ্নিকাণ্ড সংঘটিত হোৱাৰ ফলত কমেও ৯ জন যাত্ৰীৰ মৃত্যু হয়। উত্তৰ প্ৰদেশৰ গ্ৰেটাৰ নয়ডাত (Greater Noida, Uttar Pradesh) সংঘটিত ঘটনাত মৃত্যু হোৱা লোকৰ সংখ্যা বৃদ্ধি পোৱাৰ আশংকা কৰা হৈছে।
বুধবাৰে ৩৫ জন যাত্ৰী লৈ নয়দাৰ পৰা মহোবালৈ গৈ আছিল এয়াৰ কণ্ডিচনাৰ (এচি) বাছখন। আৰক্ষীৰ সূত্ৰৰ পৰা জানিব পৰা মতে, মাজনিশা যমুনা এক্সপ্ৰেছৱে’ৰ মাজেৰে পাৰ হৈ যাওঁতে জেৱাৰৰ সমীপৰ দয়ানতপুৰ গাঁৱত বাছখনত অগ্নিকাণ্ড সংঘটিত হয়। সেই সময়ত অধিকাংশ যাত্ৰী শুই আছিল। ফলত জুই লগাৰ উপলব্ধি কৰিবলৈ বহু সময় লাগে। এই সন্দৰ্ভত এজন যাত্ৰীয়ে সংবাদ সংস্থা এএনআইক কয়, “মই শুই আছিলোঁ। এজনে কৈছিল বাছখনত জুই জ্বলি আছে। আমি ভয়তে চিঞৰিবলৈ ধৰিলোঁ। বাছৰ পৰা নামিবলৈ সহজ নাছিল। কাৰণ সকলো ধোঁৱাৰে আৱৰি ধৰিছিল। কেনেবাকৈ আমি নামি আহিলোঁ।”
অগ্নিকাণ্ড সংঘটিত হোৱাৰ লগে লগে বাছখনৰ ভিতৰত হুলস্থুল আৰম্ভ হয়। কাঁচৰ খিৰিকী ভাঙি জঁপিয়াই ওলাই আহে বহু যাত্ৰী। অগ্নিকাণ্ডৰ খবৰ পোৱাৰ পিছতে আৰক্ষী আৰু অগ্নিনিৰ্বাপক বাহিনী উপস্থিত হৈ উদ্ধাৰৰ কাম আৰম্ভ কৰে।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই ঘটনাত মৃতকৰ পৰিয়াললৈ সমবেদনা জ্ঞাপন কৰিছে। স্থানীয় কৰ্তৃপক্ষক আহতসকলক উপযুক্ত চিকিৎসা প্ৰদান কৰিবলৈ নিৰ্দেশ দিয়া হৈছে। অগ্নিকাণ্ডৰ কাৰণ অৱশ্যে এতিয়াও স্পষ্ট হোৱা নাই। অগ্নিনিৰ্বাপক বাহিনীৰ সূত্ৰ অনুসৰি, বিষয়টোৰ তদন্ত অব্যাহত আছে।
