অৱশেষত সপ্তাহৰ প্রথম তিনিটা দিনত গ্ৰহণ কৰা ধর্মঘটৰ (Bank strike) সিদ্ধান্ত শেষ মুহূর্তত উঠাই লৈছে বেংক ইউনিয়নবোৰে। বেংক কৰ্মচাৰী-বিষয়াৰ সাতটা সংগঠনৰ যৌথ মঞ্চ ইউনাইটেড ফ’ৰাম অব বেংক ইউনিয়নে দেওবাৰে নিশা বিবৃতি দি জনাইছে যে সম্প্ৰতি ধর্মঘট নহয়। ফলত ২৮ ছেপ্টেম্বৰ, সোমবাৰৰ পৰা ৩০ ছেপ্টেম্বৰ, বুধবাৰলৈ বেংক খোলা থাকিব। কিন্তু শেষ মুহূর্তত কিয় সংগঠনটোৱে ধর্মঘটৰ সিদ্ধান্ত উঠাই ল’লে?
ইণ্ডিয়ান বেংক এছোচিয়েচনৰ সৈতে দেওবাৰে নিশা জৰুৰী বৈঠকত বহে ইউএফবিইউ। ইউএফবিইউয়ে জনোৱা মতে, বেংক কর্মচাৰীসকলৰ দাবী সম্পর্কত তেওঁলোকে নির্দিষ্ট কিছু আশ্বাস লাভ কৰিছে। সেই কাৰণেই সম্প্ৰতি ধর্মঘটৰ সিদ্ধান্ত স্থগিত ৰখা হয়। দাবী পূৰণৰ বাবে আলোচনা হ’ব। অৱশ্যে ইয়াৰ পিছত যদি দাবী মানি নলয় তেন্তে আগন্তুক সময়ত পুনৰ আন্দোলনৰ পথত নামিব পাৰে বেংক কৰ্মচাৰীৰ সংগঠনকেইটা।
উল্লেখযোগ্য যে বেংক কৰ্মচাৰীসকলৰ মূল দাবী আছিল সপ্তাহত পাঁচ দিন কৰ্মদিন আৰু দুদিন ছুটি নিশ্চিত কৰিব লাগিব। এতিয়ালৈকে প্রতি মাহৰ দ্বিতীয় আৰু চতুর্থ শনিবাৰে বেংক বন্ধ থাকে। কিন্তু বেংক কৰ্মচাৰীসকলে দেওবাৰৰ লগতে প্রতি শনিবাৰেও ছুটি বিচাৰিছে। দীর্ঘদিন ধৰি এই দাবী পূৰণ হোৱা নাই। সম্প্রতি তেওঁলোকে ইয়াৰ দাবীত বৃহত্তৰ আন্দোলনৰ সিদ্ধান্ত লয়। ইয়াৰ উপৰি অৱসৰপ্রাপ্ত কর্মচাৰীসকলৰ পেঞ্চন, মহার্ঘ ভাট্টা সম্পৰ্কীয় কিছু দাবীও আছিল। দেওবাৰে নিশাৰ বৈঠকত গ্ৰহণ কৰা সিদ্ধান্ত অনুসৰি শনিবাৰৰ দিনটো ছুটি ঘোষণা কৰাৰ দাবী পৰ্যালোচনাৰ বাবে আইবিএ আৰু ইউএফবিইউৰ প্রতিনিধিক লৈ এখন উচ্চ স্তৰীয় কমিটি গঠন কৰা হ’ব। তাত ইয়াৰ সম্ভাব্য বিকল্পসমূহ আলোচনা হ’ব।
বেংক ইউনিয়নবোৰৰ আৰু এটা দাবী হ’ল, স্কেল ৪ আৰু তাৰ ওপৰৰ পদমর্যাদাৰ বিষয়াসকলৰ বাবে কর্মদক্ষতাৰ ভিত্তিত ইনছেনটিভ ব্যৱস্থা (পিএলআই) আৰম্ভ কৰা। এই সন্দৰ্ভতো যোৱা নিশাৰ বৈঠকত আলোচনা হৈছে।
