উচ্চতম ন্যায়ালয়ে সময়সীমা বান্ধি দিয়াৰ পাছতো দিল্লীত দীপাৱলীৰ নিশা আতচবাজীৰ ঢৌৱে কঁপাই তোলে ৰাজধানী দিল্লী। ফলত সোমবাৰে পুৱাৰে পৰা সমগ্ৰ ৰাজধানীখন বিষাক্ত ধোঁৱাৰ চাদৰে (Delhi Pollution) আৱৰি ধৰে। কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ (চিপিচিবি) তথ্য অনুসৰি, দীপাৱলীৰ পিছদিনা পুৱা দিল্লীৰ কেইবাটাও স্থানত বায়ুৰ গুণাগুণ সূচকাংক (একিউআই) ৪০০ৰ সীমা অতিক্ৰম কৰি ‘গুৰুতৰ’ স্তৰত উপনীত হয়। ঘন ধোঁৱাৰ বাবে ইণ্ডাৰলককে ধৰি মহানগৰীৰ বৃহৎ অঞ্চলত পুৱাৰ ভাগত একো মনিব নোৱৰা হয়। চিপিচিবিৰ তথ্য অনুসৰি, সোমবাৰে পুৱা ৪.২০ বজাত আইটিঅ’ এলেকাত বায়ুৰ গুণাগুণ সূচকাংক (একিউআই) ৪০৬ত ৰেকৰ্ড কৰা হয়, যিটো ‘ভয়ানক’ স্তৰৰ ভিতৰত পৰে।
তদুপৰি ৰাজধানীৰ অন্যান্য গুৰুত্বপূৰ্ণ অঞ্চলসমূহৰ বায়ুৰ গুণাগুণো ‘অতি বেয়া’ স্তৰত আছিল। দিন ১.৩০ বজাত ৰাজীৱ চকত একিউআই ৩৮১ আৰু পুৱা ৪ বজাত দক্ষিণ সম্প্ৰসাৰণৰ কাষৰীয়া অঞ্চলৰ একিউআই ৩৬০ ৰেকৰ্ড কৰা হয়। পৰিস্থিতিৰ সৈতে মোকাবিলা কৰিবলৈ দিল্লী আৰু সংলগ্ন ৰাষ্ট্ৰীয় ৰাজধানী অঞ্চল (এনচিআৰ) ইতিমধ্যে তৃতীয় পৰ্যায়ৰ প্ৰদূষণ নিয়ন্ত্ৰণ ব্যৱস্থা বা ‘GRAP-3’ (Graded Response Action Plan)ৰ অধীনত আছে।
কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ মতে ০-৫০ একিউআই ‘ভাল’, ৫১-১০০ ‘সন্তোষজনক’, ১০১-২০০ ‘মধ্যমীয়া’, ২০১-৩০০ ‘বেয়া’, ৩০১-৪০০ ‘অতি বেয়া’ আৰু যদি ৪০০ তকৈ অধিক হয় তেন্তে ইয়াক ‘ভয়ানক’ বুলি গণ্য কৰা হয়। ২ নৱেম্বৰত উচ্চতম ন্যায়ালয়ে দীপাৱলীৰ বাবে অনুমোদিত সেউজীয়া ফটকা নিৰ্মাণ, বিক্ৰী আৰু ফুটাবলৈ চৰ্তসাপেক্ষ অনুমতি দিছিল যদিও নিশা ১০ বজাৰ সময়সীমা নিৰ্ধাৰণ কৰিছিল। শীর্ষ আদালতে ৯ নৱেম্বৰৰ পৰা ফটকা সম্পূর্ণ নিষিদ্ধ কৰাৰ নির্দেশো দিয়ে৷ উৎসৱৰ পূর্বে দিল্লী চৰকাৰেও নাগৰিকসকলক আদালতৰ নির্দেশ মানি চলিবলৈ আবেদন জনাইছিল৷ কিন্তু বাস্তৱত দেওবাৰে নিশা ১০ বজাৰ সময়সীমাৰ পাছতো ৰাজধানীত দীৰ্ঘসময় ধৰি ফটকা ফুটোৱা হৈছিল।
চৰকাৰী পৰিসংখ্যা অনুসৰি, এই নিয়ম উলংঘাৰ বাবে মহানগৰীৰ বিভিন্ন প্ৰান্তত বায়ু প্ৰদূষণৰ মাত্ৰা বিশ্ব স্বাস্থ্য সংস্থাই (WHO) নিৰ্ধাৰণ কৰা নিৰাপদ সীমাৰ ৫০ গুণতকৈও অধিকলৈ বৃদ্ধি পালে। দিল্লী প্ৰদূষণ নিয়ন্ত্ৰণ সমিতিৰ তথ্য অনুসৰি, দেওবাৰে নিশা ১১ বজাৰ ভিতৰত অক্ষৰধাম অঞ্চলৰ বায়ুত মিহি ধূলিৰ কণা বা ‘পিএম ২.৫’ৰ মাত্ৰা ৭৬০.৯৯ মাইক্ৰ’গ্ৰাম প্ৰতি ঘনমিটাৰত উপনীত হয়। কিন্তু বিশ্ব স্বাস্থ্য সংস্থাৰ মানদণ্ড অনুসৰি ২৪ ঘণ্টাত বতাহত পিএম ২.৫ৰ সৰ্বোচ্চ অনুমোদিত সীমা প্ৰতি ঘনমিটাৰত মাত্ৰ ১৫ মাইক্ৰ’গ্ৰামহে। অৰ্থাৎ দেওবাৰে নিশা অক্ষৰধামৰ বায়ু প্ৰদূষণৰ মাত্ৰা বিশ্ব স্বাস্থ্য সংস্থাৰ নিৰাপদ সীমাতকৈ প্ৰায় ৫০.৭৩ গুণ বেছি আছিল।
