আসন্ন লোকসভা নিৰ্বাচনৰ প্ৰতি লক্ষ্য ৰাখি দুই পার্বত্য জিলাত বিজেপি নেতৃত্বাধীন স্বায়ত্ত শাসিত পৰিষদে অনুষ্ঠিত কৰি অহা ঐক্য-বিজয় আৰু সমৃদ্ধি ৰেলী আজি ধনশিৰি পৰিষদীয় সমষ্টিত অনুষ্ঠিত হৈ যায়। ধনশিৰি স্পৰ্টছ কমপ্লেক্সত অনুষ্ঠিত হোৱা এই ৰেলীত সমষ্টিটোৰ সহস্রাধিক লোক উপস্থিতিত থাকে।
পৰিষদৰ মুখ্য কাৰ্যবাহী সদস্য তুলিৰাম ৰংহাং, বিধায়ক বিদ্যাছিং ইংলেং, দৰছিং ৰংহাং, পৰিষদৰ সকলো কার্যবাহী সদস্য আৰু এমএচি উপস্থিত থকা সভাত আদৰণি ভাষণ পাঠ কৰি এমএচি তিলোত্তমা হাঞ্চুয়ে বিজেপিৰ শাসন কালত সমষ্টিটোরে উন্নয়ন আৰু শান্তিৰ পথত ধাৱমান হৈছে বুলি দাবী কৰে। এতিয়া দুয়োখন পার্বত্য জিলাত ঘৰে ঘৰে তুলিবাম ৰংহাং এক জনপ্রিয় নাম বুলি উল্লেখ কৰে।
সভাখনত বিধায়ক দুগৰাকীয়েও উন্নয়নমূলক আঁচনি সন্দর্ভত ভাষণ ৰাখে। মুখ্য কার্যবাহীসদস্যগৰাকীয়ে বিগত ৭টা বছৰত বিজেপি চৰকাৰৰ নেতৃত্বত হোৱা বিভিন্ন উন্নয়নমূলক আঁচনি সন্দর্ভত বিতং ব্যাখ্যা দাঙি ধৰে। আনহাতে, সংবাদমাধ্যমৰে হোৱা বাৰ্তালাপত মুখ্য কাৰ্যবাহী সদস্য তুলিৰাম ৰংহাঙে কয় যে, ৰাইজৰ মৰম-চেনেহ আৰু আশীর্বাদ নহ’লে পৰিষদ বিৰোধী শূন্য নহ’ল হেতেন।
মুখ্যমন্ত্রী ডঃ হিমন্ত বিশ্ব শৰ্মাৰ প্রতিশ্রুতি অনুসৰি ডিফু-ধনশিৰি ২৬ কিলোমিটাৰ পথ এতিয়া নির্মাণ হৈ আছে বুলিও দাবী কৰি অহা ৫ মাহৰ ভিতৰত এই পথ সম্পূর্ণ হ’ব বুলি ঘোষণা কৰে। বিজেপি চৰকাৰে জলজীৱন মিচন, বিপিএল কার্ড, অৰুণোদয়, পিএমএৱাই, আয়ুষ্মান কার্ড আদি আঁচনিৰ জৰিয়তে ৰাইজৰ জীৱিকা সূচল কৰি তুলিছে বুলিও ৰংহাঙে দাবী কৰে।
উল্লেখ্য যে আজিৰ এই ৰেলীত বিভিন্ন দলৰ প্ৰায় ৭০০ লোকে বিজেপিত যোগদান কৰাৰ কথা উল্লেখ কৰি মুখ্য কার্যবাহী সদস্য ৰংহাঙে পৰিষদৰ প্রাক্তন মুখ্য কাৰ্যবাহী সদস্য, অধ্যক্ষ, কাৰ্যবাহী সদস্যকে ধৰি প্ৰায় ৩০ হেজাৰ লোকে বিগত দুবছৰত বিজেপি দলত যোগদান কৰা বুলিও দাবী কৰে।
