যোৱাকালি নিশা ধুবুৰী আৰক্ষীয়ে এক কনিষ্ট’বলক মাৰপিট কৰাৰ ঘটনাৰ সৈতে জড়িত দুজন মূল অভিযুক্তক গ্ৰেপ্তাৰ কৰাৰ তথ্য প্ৰকাশিত হৈছে।। উল্লেখ্য যে, বিগত ২২ এপ্ৰিলৰ দিনা ধুবুৰীৰ আৰক্ষী ছাউনিৰ সন্মুখৰ ৰাজপথত এগৰাকী কনিষ্ট’বল এগৰাকীক বেয়াকৈ মাৰপিট কৰিছিল এটা উন্মত্ত দলে। দৰাচলতে, দক্ষিণ শালমাৰা থানাত ৰুজু হৈ থকা এনডিপিএছ আইনৰ ২১(বি) আৰু ২২(চি) ধাৰাত ৪৫/২৫ নম্বৰৰ এক গোচৰৰ ভিত্তিত সিদিনা দক্ষিণ শালমাৰা আৰক্ষী থানাৰ এটি দলে আজি ধুবুৰী চহৰৰ পাৰ্শ্ববৰ্তী নিউঘাট অঞ্চলত এক অভিযান চলাইছিল
ধুবুৰী সদৰ থানাৰ কনিষ্ট’বল আব্বাছ আলীৰ সহযোগত চলোৱা সেই অভিযানত কৰায়ত্ত হৈছিল কুদ্দুছ আলী নামৰ ড্ৰাগছ সৰবৰাহকাৰীজন। কিন্তু কুদ্দুছক কৰায়ত্ত কৰাৰ পিছতে জাঙুৰ খাই উঠিছিল অঞ্চলটোৰ বহু পুৰুষ-মহিলাই আৰু চাঁচা লৈছিল আৰক্ষীৰ অভিযানকাৰী সেই দলটোক। খেদি খেদি ধুবুৰী আৰক্ষী ছাউনিৰ সন্মুখলৈ আহি উপস্থিত হৈছিল উন্মত্ত সেই দলটো। ইফালে, কথমপি আৰক্ষীৰ দলটো আৰক্ষী ছাউনীত প্ৰৱেশ কৰিছিল যদিও সেই স্থানত গোট খোৱা উন্মত্ত সেই দলটোৰ হেঁচাত বাহিৰলৈ ওলাই আহিবলৈ বাধ্য হৈছিল আব্বাছ আলীয়ে।
দলটোৰ একাংশই আলীক বেয়া ধৰণে মাৰপিট আৰম্ভ কৰাৰ পিছত যেন হুঁছ আহিছিল ধুবুৰী আৰক্ষীৰ আৰু একছন মুডত নামি মাৰপিটত ৰ’ত সেই দলটোৰ পুৰুষ-মহিলাকে ধৰি মুঠ ১২ গৰাকী লোকক আটক কৰিছিল। ইপিনে সিদিনাৰ সেই ঘটনাৰ মূল অভিযুক্ত মন্টু আলী আৰু মহিবুল আলী নামৰ লোক দুজন দিনে পলাতক অৱস্থাত আছিল যদিও যোৱানিশা দুয়োকে কৰায়ত্ত কৰিবলৈ সক্ষম হয় আৰক্ষীয়ে।
