মণিপুৰ Manipur ত বিজেপি BJP নেতাক গুলীয়াই হত্যা। হত্যাকাণ্ডৰ মূল অভিযুক্তই পিছত আত্মসমৰ্পণ কৰে। হত্যাকাণ্ডত ব্যৱহৃত অস্ত্ৰ উদ্ধাৰ হয় তেওঁৰ পৰা। মণিপুৰৰ থৌবাল জিলাত সংঘটিত হৈছে এই ঘটনা। ঘটনা সন্দৰ্ভত আৰক্ষীয়ে গ্ৰেপ্তাৰ কৰে আন এজন সন্দেহজনক ব্যক্তিক।
মণিপুৰত বিজেপিৰ প্ৰাক্তন সেনাবাহিনী শাখাৰ আহ্বায়ক লাইশ্ৰম ৰামেশ্বৰ সিঙক Rameswar Singh ঘৰৰ সন্মুখত গুলীয়াই হত্যা কৰা হৈছে বুলি ইউবলৰ আৰক্ষী অধীক্ষক হাওবিজাম যোগেশচন্দ্ৰই জানিবলৈ দিয়ে। মঙলবাৰে পুৱা প্ৰায় ১১ বজাত এখন গাড়ীৰে লাইশ্ৰমৰ ক্ষেত্ৰ লেইকাই অঞ্চলৰ ঘৰৰ সন্মুখত উপস্থিত হয় দুজন ব্যক্তি। সেই সময়ত লাইশ্ৰম ঘৰৰ বাহিৰত থিয় হৈ আছিল।
দুৰ্বৃত্তই পোনে পোনে লাইশ্ৰমৰ ওপৰত গুলী চলাবলৈ আৰম্ভ কৰে। বিজেপি নেতাজনৰ বুকুত গুলী লাগে। থিতাতে তেওঁ ঢলি পৰে। তাৰ পিছত অপৰাধীকেইটা গাড়ীৰে পলায়ন কৰে। আৰক্ষীৰ সূত্ৰ অনুসৰি, গাড়ীখনৰ কোনো পঞ্জীয়ন নম্বৰ নাছিল। ততাতৈয়াকৈ লাইশ্ৰমক ওচৰৰ চিকিৎসালয়লৈ লৈ যোৱা হয় আৰু চিকিৎসকে তেওঁক মৃত বুলি ঘোষণা কৰে।
ইয়াৰ পিছতে আৰক্ষীয়ে চৌদিশে তালাচী চলায়। এঘণ্টাৰ ভিতৰতে নৌৰেম ৰিকি পইণ্টিং সিং নামৰ এজন ব্যক্তিক আৰক্ষীয়ে গ্ৰেপ্তাৰ কৰে। জানিব পৰা মতে, গাড়ীখনৰ চালকৰ আসনত নৌৰেম আছিল। তেওঁক সোধা-পোছা কৰাৰ অন্তত আয়েকপাম কেশোৰজিত নামৰ এজন ব্যক্তিৰ নাম উদ্ধাৰ হয়। লাইশ্ৰমৰ ওপৰত গুলীচালনা কৰাজনেই তেওঁ।
অতি কম সময়ৰ ভিতৰতে ৪৬ বছৰীয়া আয়েকপামে পশ্চিম ইম্ফল জিলাৰ কমাণ্ডো কমপ্লেক্সত আত্মসমৰ্পণ কৰাৰ খবৰ পোৱা যায়। তেওঁৰ পৰা এটা পিষ্টল, দুটা মেগজিন আৰু ৯ ৰাউণ্ড সতেজ কাৰ্টিজ উদ্ধাৰ কৰা হৈছে। ইয়াৰ উপৰি এটা খালী গুলীৰ খোলাও উদ্ধাৰ কৰা হৈছে।
ৰাজনৈতিক কাৰণেই হওক বা ব্যক্তিগত শত্ৰুতাই হওক – অভিযুক্তক গ্ৰেপ্তাৰ কৰিব পাৰিলেও হত্যাৰ কাৰণক লৈ আৰক্ষী বিমোৰত পৰিছে। তদন্তৰ পিছত স্পষ্ট হʼব বুলি জানিবলৈ দিয়ে আৰক্ষী অধীক্ষকে।
মণিপুৰত পিটিআইৰ সৈতে হোৱা এক সাক্ষাৎকাৰত বিজেপিৰ ৰাজ্যিক উপ-সভাপতি চিদানন্দ সিঙে কয়, “আমি এনে কাপুৰুষালি কাৰ্যক গৰিহণা দিছো। আমি বিশ্বাস কৰোঁ যে অভিযুক্তৰ বিৰুদ্ধে কঠোৰ ব্যৱস্থা গ্ৰহণ কৰা হʼব।”
