ডিফু, ১৫ ফেব্ৰুৱাৰীঃ স্বাস্থ্য বিভাগৰ প্ৰশ্ন কাকত ফাদিল(Paper Leak) কৰি মৰিগাওঁ জিলাৰ এহাল স্বামী-স্ত্ৰী বৰ্তমান ৰঙাঘৰৰ আলহী হোৱাৰ পিছত এইবাৰ পাৰ্বত্য জিলাতো নৱম শ্ৰেণীৰ বাৰ্ষিক পৰীক্ষাৰ বিভিন্ন প্ৰশ্ন কাকত ফাদিল কৰি আৰক্ষীৰ জালত পৰিল দুজন লোক ৷
প্ৰাপ্ত খবৰ অনুসৰি কাৰবি আংলঙ স্বায়ত্তশাসিত পৰিষদৰ অধীনস্থ বিদ্যালয় সমূহৰ বছেৰেকীয়া পৰীক্ষাৰ নৱম শ্ৰেণীৰ বিভিন্ন বিষয়ৰ প্ৰশ্ন কাকত ফাদিল কৰা গোছৰৰ তদন্ত চলাই কাৰবি আংলং আৰক্ষীয়ে ডলামৰা মালাচী হাইস্কুলৰ চকীদাৰ সহ দুজন ব্যক্তিক গ্ৰেৰ্তাৰ কৰিবলৈ সক্ষম হয় ৷ কাৰবি আংলং জিলা আৰক্ষী অধীক্ষক সঞ্জীৱ কুমাৰ শইকীয়াই আজি এক সংবাদমেল যোগে এই কথা প্ৰকাশ কৰে ৷
সংবাদমেলত আৰক্ষী অধীক্ষক গৰাকীয়ে কয়যে, বিষয়টো সন্দৰ্ভত গোচৰৰ তদন্ত চলাইছিল উপ আৰক্ষী অধীক্ষক (প্ৰৱেশ্যনাৰী) নিলোৎপল শইকীয়াই ৷ তদন্তকালত বিষয়া গৰাকীয়ে ডলামৰা মালাচী হাইস্কুলৰ চকীদাৰ চেমুৱেল ইংতিয়ে বিদ্যলয়খনৰ প্ৰশ্ন কাকত চুৰ কৰি আন্দ তেৰাঙ নামৰ এগৰাকী ব্যক্তিক বিক্ৰি কৰিছিল বুলি জানিব পাৰে ৷ তাৰ পিছতে চকীদাৰ চেমুৱেল ইংতি আৰু আনন্দ তেৰাঙক আৰক্ষীয়ে গ্ৰেপ্তাৰ কৰে ৷ উল্লেখযোগ্যযে, এই সন্দৰ্ভত পূৰ্বেও শিক্ষক সহ তিনিজন লোকক আৰক্ষীয়ে সোধ পোছৰ বাবে থানালৈ তলৱ কৰিছিল ৷
